وئرگول، آذربایجان تورکجه سینده نه زامان و هاردا یازیلار؟
- توضیحات
- منتشر شده در چهارشنبه, 21 آبان 1393 22:22
آنا ديليميزده "کي" باغلاييجيسيندان سونرا وئرگول گلير.
مثلا:
من اونا دئديم کي، اينسان باشقالاري ايله موناسيبتده خوشگؤرولو اولماليدير.
2. بو سؤزلردن اؤنجه وئرگول يازيلير: آنجاق، لاکين، يالنيز، فقط، آما، يوخسا، يعني.
مثلا:
- من اونا حؤرمتله ياناشديم، آنجاق او بير آز نزاکتسيز داوراندي.
- بو ايشي گؤرمک لازيمدير، لاکين داها صبير و تمکينله.
- دنيز ده گؤزلدير، يالنيز من اورماني سئورم.
- سياحت گؤزل شئيدير، فقط بو تهلوکه‌لري اولماسا.
- من باکييا گئتمک ايسترديم، آمما ويزا چتينليگيم وار.
- بو ايشين اوزرينده چوخ چاليشماق لازيم، يوخسا اؤز- اؤزونه باشا چاتماز.
- بيز پلانلاريميزي گلن ايل، يعني نؤوروز بايراميندان سونرايا حاضيرلاماليييق.
3. اگر "او" (کيم) ضمير آنلاميندا اولور و "او"دان سونرا باشقا بير ضمير و يا ايسم گليرسه "او" ضميريندن سونرا وئرگول يازيلير.
مثلا:
- او، سئوداني تئاترا دعوت ائتدي.
- او، سني مي چاغيرير؟
- او، داغا چيخماقدان خوشلانير.
- او، دميرچيدير.
يوخاريداکي اؤرنکلرده وئرگول قويولمازسا جومله باشقا معنا وئره بيلر.
اگر "او" (هانسي) ضمير آنلاميندا اولمازسا، "او"دان سونرا وئرگول گلمز. مثلا:
- او کيتابي من ده اوخوموشام.
"او" ايشاره ضميري آنلاميندا ايسه يئنه ده وئرگول يازيلماز. مثلا:
- او آدامي تانيييرام.
اگر "بو" ياخينا ايشاره ضميري آنلاميندا او زامان "بو"دان سونرا وئرگول يازيلماز. مثلا:
- بو ايش منيم اوچون دئييلدير.
- بو آدامي من تانيميرام.
- بو يول عئيني يولدور يولچوسو يوخدور.
- بو داغ عئيني داغدير قارتالي يوخدور.
- بو يولون سونو سن اولي منم
سنه چاتاجاغيم بير گون اولاجاق
اوزاقدا، ياخيندا اولساق دا نه قم
بو يول بو دونيادا بيزه قالاجاق
اگر "بو" ياخينا ايشاره ضميري دئييل و ايسم يئرينده ايسه او زامان "بو"دان سونرا وئرگول گلير. مثلا:
- بو(نه)، او دئمکدير کي، سن بو ايشله راضيلاشميرسان.
- بو(نه)، سؤزلري يانليش آنلاماقدير.
- بو، داغلارا يوکسلمک اوچون بير داغچيليق پلانيدير (پلان=طرح).
اگر ديقتله باخارساق، يوخاريداکي اؤرنکلرده (نومونه‌لرده) وئرگول قويولمازسا جومله‌لرين آنلامي تامامن دَييشير.
قایناق: http://kayzen.az/
بیرلیک- مئدیا طرفیندن کؤچورولموشدور
