Warning
  • JLIB_APPLICATION_ERROR_COMPONENT_NOT_LOADING
  • JLIB_APPLICATION_ERROR_COMPONENT_NOT_LOADING
  • JLIB_APPLICATION_ERROR_COMPONENT_NOT_LOADING
  • Error loading component: com_content, Component not found.
  • Error loading library: joomla, Library not found.
  • Error loading library: joomla, Library not found.
  • Error loading library: joomla, Library not found.
  • Error loading component: com_content, Component not found.
  • Error loading component: com_content, Component not found.

معصومه قرباني: عليرضا نابدل ين يالقيز قارا آغاج آدلى شعرى حاقدا

يالقيز قارا آغاج
داغ اته­ گينده
تک اوتوروپسان
يولو گؤزلورسن؟
سن تک قاليپسان
من تک قالميشام
سن چوق يازيقسان
يا من يازيقام؟
يالقيز قارا آغاج
درديميز بيردير
باخ بورا گؤروم
کیمی گوزلورسن؟
کيمي گؤزلورسن
دره‌نين تکين نييه گؤزلورسن؟
يارسيز، يولداشسيز
تک ياشاماقا
محکوم اولوپسان.
يالقيز قارا آغاج
سن آداملاردان
وفا گؤرمه‌دين.
سؤيکشميش، او بؤيوک، توم بوتاغلارون
دردلی قلبيوی اورتايا آليپ
لاکين بو سيررلی محنت چکميش اوره­گين
اوزون ايللردن بری دؤگونمکده‌دير.
سن تک سن دره‌نين يالقيز آغاجی
من تک ام. يالقيزدير شهرده هامی
لاکن تک ليکده
بيريک، قارا آغاج!
عليرضا نابدل اوختاى.
اوختايين (عليرضا نابدل) يالقيز قارا آغاج آدلى شعرى بلكه اوختاي يا اَن ياخين كاراكتر دير،دوغرودور كى اينسان يازديغى اثرلرين كاراكترى اوزو دئيل اما بودا وار كى يازار يازديغى اثرلرين كاراكتر و قهرمان لارينان بير نشانه لر داشير و اَن آزيندان اثرى يازديغى حالدا اوزونو كاراكترين يئرينه قويا بيلير.
قارا آغاج بير آغاج تورودور كى اَكين يئرلري يا داغ اَتگينين كنارلاريندا اكونوميك مصرفى اولماديغى ايچون تك -توك اوز-اوزونه يئتيشير.قارا آغاجين اوزليغى اونون آفات،يئل و سوسوزلوخ قاباغيندا ديره نيشيدير.نئجه كى اوختايين شعرينده قارا آغاج ديرنيش و باش قالديرما سمبولودور.اما بو شعرده قارا آغاج اوزليغى ندير و يا سبب لر ندير كى قارا آغاج شعرى بوگون ده هله تزه ليغين قورويورو  و اونان آرتيق اوختاى دان قارا آغاجين نه توتارلارى وار؟
او زمانه كى ياشام كوتلوى(توده اى) اولوب و دوشونجه قيزيل و گوج صاحابلارى طرفيندن كنترول اولونور و دوشونمَك او يئره كيمى آزاددير كى گوج صاحيبلرى اونو روا بيلرلر.او زمانه كى دوشونجه و عليم اينسانلارى سعادتمند ائلَمك ترسينه،پول و گوج صاحيبلارينين اَلينده بير ابزار اولاراق اونو كوله(برده)ائله مه غه چاليشير و او زامان كى هر كس بو باسقى لارين قارشى سيندا كوتلوى باش اَيْيير،اوندادير قاراآغاج باش قُوْزايير.آغير و حيزلى يئل اسَنده هر كس سيرتين يئله سارى دونده ريب اوزونو محافظت ائللر اما قارا آغاج اُزونو يئله سارى دوندَرير اما اونون اوزليغى يئلدَن ساواشيب اونا ظفر قازانما دئيل،بلكه يئلى اوزونده حل ائتمك ايستير.نه موتلو اونلارا كى يئل اَسَديغى زامان سيرت لارين يئله دئيل بلكه اوزلرين يئله سارى دوندَريرلر.
عاصى قارا آغاج قارانليق و ظلمات دوره سينده ايشيق ساچماغا چاليشير او زامان كى قارانليق گوجلرين مئدياسى انسانلارى سكس و مصرف رئكلام لاردان بمباردمان ائليرلر،او زامان كى كيمسه بير ثانيه بئله اوز حاليندا دوشونمك ايچون تك بوراخيلمير،او زامان كى انيورسته لر گوج و پول صاحيبلارينين ابزارى حالينا چونوب و ازيلميش ميلتلره قوندارما كيمليك كشف ائليرلر،او زامان كى كوتله (توده اى)حاليندا ياشاماق بير ديَر(ارزش) حالينا چئوريلير-قارا آغاج اوز تكليغين قورويور و سينميش قول بوتاسين ييغجاملاياراق باش قالديرير.نه موتلو اونلارا كى باسقى لار آلتيندا كوتله لشميرلر و تكليخ لرين قورويوب و باش قالديريلار.
ميليونلارجا اينسان آجليخدان گبَرير،ميليونارجا اينسان ظولوم و باسقى آلتيندا ياشايير،ميليونلارجا اينسان منسوب اولدوغو كيمليك لره گوره اينكار و حقارته معروض قاليرلار.اسكى زامانلاردا اينسانلارين بوينون داكى قاندالار پولادانيدير،او زامانلار اينسان لار كوله اولدوخ لارين فرقينده ديلر و اونلارين سئچيمى اخلاقى اولاراق اوز وجدانلارينا قالميشدى كى بو قاندالارى قيرماغا عصيان ائليه لر و يا بو قاندالارى بويونلاريندا محافيظت ائليه لر.اسكى اينسانلارين مسله سى سئچيميدير اما ايندى كى زمانه ده كى مئديا،پول و حكومت و اونورسيته حاكيم لرين الينده بو زنجيرلرى تئوريزه ائلمك ايچون بير ابزار اولاراق قولانيلار،مسله سئچيم دئيل!مسله بوردا كى بيزيم كوله ليخ ايندى رئكلام و تئورى  واسيطه سيله گرچكله شير.اسكى زمانه قاندالارى پولاد دان اولدوغو حالدا ايندى كى قاندالار لطافتلى ايپك دن دير.اسكى قاندالار سَسلى  و آغير اولدوغو ايچون هر زامان حيس اولونوردو اما ايندى كى لطافتلى ايپك قاندالار ساتيلميش عاليم لر يارديمى لا  چكيجى هاله لرى وار كى حتى اونو بوينوموزدا اولدوغو ايچون اوزوموزو خوشبخت احساس ائليريخ!ايندى كى زمانه ده كوله لرين كوله صاحيبلارينين عليه نه عصيان سئچيمى دئيل بلكه كوله ليخ لريندن لذت آپارمالارى دير كى عاصى قارا آغاجين اوره گين آغريدير اونون اصيل ساواشى نه كوله صاحيبلارينان كى بلكه اوز ايچينده كوله ليغين چَكيجى هاله سينن دير.نه موتلو اونلارا كى بوينون داكى قاندالارين فرقين ده وارديلار و اوز ايچلرينده بو كوله ليغين چكيجى هاله سينه غلبه تاپيديلار.
قارا آغاجين اورگينين كدرى بوينون دا كى قاندالار  دئيل بلكه چئويره سينده كى اينسان لارين او قاندالارى سئومه سينده دير و اونون ياشامينين آجى سى بوردان باشلير كى اونون آييلماسى ياتانلارى اينجيدير!اما مگر او ياتانلارى آوياتماقدان اونلارا خيدمت منظورو يوخدو؟اما قارا آغاجين اوزليغى سئوگى سينده،او ياتانلارى او قدر سِئوير كى اونلارا گوردوغو ايشلره بير خيدمت اينتظارى اولمور!او دردى كدرين يايقين اولدوغو حالدا درد و كَدر دن قاچمير بلكه درد و كدرَ هجوم ائلير اما درد و كدرين ايچينده اريمير،بلكه درد و كدرى اوز ايچينده اريدير.قارا آغاجين بويوك اوزليغى باش قالديرما اولسا دا انون بويوك گوزليغى ده سئوگى دير كى اونو باش قالديرماغا مجبور ائلير بو اونون سوگى دير قاراآغاج شعر و شاعرين بيزيم ايچيميزده ياشادير.نه موتلو اونلارا كى باش قالديريلار و اونان برابر ياتانلارا و باش قالديرديغى اينسانلارا دا سئوگى لرى آرتير.
او زامان كى ظاليم سياستچى لر ميليونلارجا اينسانانى گوزل يالانلاردان يالاديلار و مئديا صاحابلارى بو يالانلارى او قدر تيكرار ائليرلر كى حتى يالان صاحيبلرى اونون دوغرو اولدوغونا اينانيرلار.او زمانه كى هر كس حقيقتى و سئوگى نى اوزونن دن ده گيزله دير.او زمانه كى اثر يازيلير تا كى ايلك اول مئديا صاحابلارى راضى اولسونلار،او زمانه كى اينسانلار اوز تكليخ لرينده ده مئديا صاحابلارى نين فيكيرلرينه قارشى دوشونه بيلميرلر.او زمانه كى آيدين اولماق مئديا صاحيبلارينين گوجونه باغليدى.او زامان كى كوله لر يئديكلرى قيرباج لاردان لذت آليرلار و حتى صاحيبلرينين اَلينده ن قيرباجى آليرلار كى تا اوزلرى اوزلرينه قيرباج وورسونلار تا ارباب اولماغى تجربه ائلسينلر.او زامان دير كى قارا آغاج باش قالديرير،او زامان دير كى قارا آغاج يئتر آرتيق دئير.قارا آغاج اوزليغى  ببير الينده سيلاح آلديغى زامان او بيرى اليندن قلمى بوراخماديغى دير حتى اونون گوزليغى قلمى اوستون توتماق دير اونون سيخديغى قورشون لار ساده جه يازديغى اثرلره قارانليق دا بير ايشيق اولسون دييه آتيليب ،او هر بوش زامان تاپديغيندا يازير اونون اوزليغى مئديا صاحيبلارينا يوخ دئمه دير او كهنه دفترينده يازير،اونون گوزليغى ده گورمه ديغى گله جك اينسان لارا يازديغى دير.نه موتلو اونلارا كى مئديا صاحيبلرينين شهرت وئريجى شهوته لرينه دئيل،اوز تنهاليغيندا اسكى دفترينده گله جك اينسانلارين خاطيرينه يازيرلار
او زمانه كى هر كس بير بيرينين كولگه سينده ياشاماق ايستير و اينسان لار اوزلرين گونش ايشيقيندان قوروماق ايچون گونش گوزلوغو،پاپاق و گونش كِرِمى قولانيلار،او زمانه كى  گونشه باخماق گوزلرى قاماشديرير.او زمانه كى هر شئيين توپولو و كوتلوى اولدوغو حالدا،اينسانلار بير بيردن دانيشماغا سوز تاپاميرلار.او زمانه كى فداكارليخ و صداقت پخمه ليق و گرى ذكاليق حساب اولونور.او زمانه كى اينسانلار اورَك سوزلرين قارداشلارينادا دئيه بيلملر و زمانه نين معروف مثلى بودور كى ديوارين سيچانى وار و سيچانين قولاغى.او زمانه كى گوَنج و اوميد بير لوكس شى دير. قاراآغاج بير قلم و كاهى دفتردن اوز تكليغينه پناه آپاريير اونون غمى نه اوز تكليغى بلكه اينسانلارين توپلو و كوتلوى ياشاديغى حالدا اوزلرين تك احساس ائله ديغى دير.قارا آغاجين اوزليغى تكليغيندن لذت آپارماسى دير و گوزليغى كولگه و قورخو اتمسفرينده گونشلنمه غى دير.نه موتلو اونلارا كى گونش آلتيندا باشقالارينين دردلرين چكديغى حالدا اوز تكليخ لريندن لذت آپاريلار.
او زامان كى يازى لار و يازارلار بير مارك و برند حالينا چئوريليبلر،يازى لارين اوخونوب يا اوخونماديغى مارك لاشما اساسيندادير،او زمانه كى يازى لار چوخ فرقلى دئيل و يازى نه كاليته اساسيندا بلكه سايى اَساسيندا ديرلنديريلير.او زامانا كى سئوگى منفعت لردن ديرلنديريلير و حتى او زامان كى اَزنلردن -ازيلنلرين كوتله اولدوخلاريندا ماهيت فرقى يوخدو.او زامان كى هر كس يئل قاباغيندا اوزونو محافيظت ائلمك ايچون اييلير،قاراآغاج اوز تك ليغنده سينير اونون اوزليغى تكليغى دير و گوزليغى سينماغى دير.او سيرلى و محنت چكميش اورگين سون لحظه ده جلادا آچماق ايستير.اونو آنلاماق ايچون اونون يارالى و قول بوتاغى سينديغى حالدا باغيرساق و اورگينى سوكوب ديشاريا توكدوغو آنى دوشنمك گرَكير،بو ايشى نفرت دن دئيل بلكه اينسانلارا و حتى جلادينا سئوگيسيندن نشات تاپان بير عمل دير.او آن،او ثانيه لر كى اورگين جلادا آچماق ايستير اورگينده اولان يازماديخلارى شعرلرى،سئوگى لرى و آرزولارى گورستمك ايستير او حتى جلادين گوزلرين اوپمك ايستير.چوخلارينين ياشاماغى سئوگى داستانى اولسا دا قاراآغاج اولومونوده سئوگى حيكايه سينه چئويرمك ايستير.نه موتلو اونلارا كى اوره ك لرين و مجال تاپيب يازا بيلمديغى اثرلرين ده انسانيته ايتحاف ائتمك ايستيرلر.
Submit to DeliciousSubmit to DiggSubmit to FacebookSubmit to Google PlusSubmit to TwitterSubmit to LinkedIn