Warning
  • JLIB_APPLICATION_ERROR_COMPONENT_NOT_LOADING
  • JLIB_APPLICATION_ERROR_COMPONENT_NOT_LOADING
  • JLIB_APPLICATION_ERROR_COMPONENT_NOT_LOADING
  • Error loading component: com_content, Component not found.
  • Error loading library: joomla, Library not found.
  • Error loading library: joomla, Library not found.
  • Error loading library: joomla, Library not found.
  • Error loading component: com_content, Component not found.
  • Error loading component: com_content, Component not found.

فمینیسم، فمینیست ناسیونالیسم و گونئی آذربایجان- افسانه سولدوزلو

هر بیر توپلومون نقدر گلیشمیش اولدوغونو فرقلی پارامترلریله آراشدیرماق مومکوندور. بونلاردان ان اونملیسی، قادینلارین توپلومدا اولان رول و یئرلریدیر.
هر بیر توپلوم زامان زامان بوحرانلارلا اوزلشیر و بو بوحرانلاری نئجه مدیریت ائتمک او توپلومون اوزلویونو و عئینی حالدا سیاسی-ایجتیماعی قووه لرین گوجونو اورتایا قویور. چوخونلوقدا ایجتیماعی نیازلارا دایالی یارانان بوحرانلاری چوزمکده، شوبهه سیز توپلومون یاری سایی سی اولان قادینلارین رولو دانیلماز و چوخ اونملیدیر. قادینلارین ایجتیماعییتی یاراتماقدا اولان ائتگیلری(عائیله، گلجک نسل و...) بو ائتگینلیگی داها دا بللی ائدیر.
گونئی آذربایجان میللی حرکتی تاریخینه بیر بالاجا باخیشیلا قادینلارین ائتگین رولونو گوره بیلیریک. شیخ محمد خیابانی و آزادیستان حرکتی، ستارخان و مشروطه قیامی، پیشه وری و میللی حکومت دونمی ان گوزل اورنکلردیر. چاغداش حرکاتیمیزا باخیرساقدا اونلارجا ایگید قادینلاریمیزین آدینی سیرالاماق اولور، شاعیرلر، سیاسی فعاللار و محبوسلاریمیز. هر میللی فعالین آناسی، باجی سی یاخود حیات یولداشی نین او میللی فعالا ان بویوک دایاق اولدوغونو نظره آلیرساق و بونا قادین میللی فعاللاریدا آرتساق، قادینلارین نقدر میللی حرکت اوچون اونملی اولمالاری داهادا گوزه چارپیر.
آنجاق گونئی آذربایجان قادین حرکتی نین فئمینیزم ایله ایلگیسی یاخود ایلیشگیسی چاغیمیزین ان اونملی سوروسو و اونا وئریلن جاوابدا ان تهلوکه لی یوللارا قاپی آچان اولابیلیر. آوروپا ایدئولوژیلرینی گونئیین ایجتیماعی دوروم و اوزللیکلرینی نظره آلمایاراق گونئی اوچون چیخیش یولو کیمی گوسترمک بویوک خطادیر. اوزلویونده ایدئولوژی اولمایان "فمینیزم"ی، میللی حرکتین قامتینه گئییندیریب "گونئی آذربایجان قادین حرکتی" آدینا گوسترمک ان آزیندان بو فیکیرده اولان یولداشلارین تمامیله سهو آنلامالارینین گوسترجه سیدیر.
بو سهو آنلاییشی ایران قادین حرکاتیندا دا گورمک اولور. فئمینیزمه ایدئولوژیک یاناشمالارینین سونوجوندا ایلک باشدا صونی شکیلده بویوک طفرلره چاتیب اورنک اولاراق "بیر میلیون ایمضا کامپانیاسی"نی یارادسالاردا نهایتده دورقونلوغا چاتمیشلار و ایندی هئچ بیر اونملی ایش آرادا یوخدور. ایدئولوژی بوشلوغونا چاتمیش ایران قادین حرکاتی نی آذربایجان اوچون "دوغرو" اورنک نظره آلیب حرکت ائتمک سهو و یانلیشدیر.
آما "فمینیزم ایدئولوژی دئییلدیر" دئدییمیز زامان فئمینیزم ایدئولوژییایا چئویریله بیلمز دوشونجه سینده دئییلیک. سوسیالیسم، لیبرالیسم، ناسیونالیسم و... ایدئولوژی اولاراق فمینیزم دوشونجه سیله بیرلشنده یئنی موکممل ایدئولوژی نی یارادابیلیرلر. بو لیسته یه دیگرلرینی ده علاوه ائده بیلریک مولتی کولتور فمینیسم، رادیکال فمینیسم، اکوفمینیسم، نئو فمینیسم، دینی فمینسیم و...
نظره گلیر گونئی آذربایجان میللی حرکتینه قادین حاقلارینی قوروماق باخیشلا(فمینیسم) بیزیم اوچون ان اویغون و یارارلی ایدئولوژی فمینیست-ناسیونال دیر. بو ایدئولوژی(ناسیونالیسمه دایالی فمینیسم)، قادین حاقلاری فعاللاری و میللی فعاللارین اورتاق چالیشما یولو و خریطه سیده آدلانیلابیلیر. قادین حاقلاری چرچیوه سینده چالیشان فعاللار ایجتیماعی-سیاسی فعالیتلرینه داوام وئره رک، ان وئریملی چیخیش یول و حاقلارا چاتماق تاکتیکی "میللی آزادلیق" نظره آلیب اینانمالاریلا فمینیست-ناسیونالیسمی یارادیرلار. اوخوماغا اورنک اوچون "قارا ناسیونال فمینیست" حرکاتی نین تاریخی، "فمینیست ناسیونالیسم" کیتابی(Lois A. West) و "ناسیونالیست فمینیسم احتیمالی" کیتابی(Ranjoo Seodu) توصیه اولونور.
بو "میللی فمینیستی حرکتی" ایندیه دک چوخلو یازیلاردا ایشاره اولوندوغو کیمی "گونئی آذربایجان قادین حرکتی" آدلاندیرمالییق. آنجاق بو آرادا بعضن بیر بالاجا یانلیشلیغا یول وئریلیر و "گ.قادین حرکتی" نی اساس اولاراق "فمینیستی" حرکت گوستریرلر. دئملی "ناسیونالیسمه دایالی فمینیسم" یئرینه بیزه "فمینیسمه دایالی ناسیونالیسمی" تجویز ائدیرلر. بونادا کیفایت ائتمه ییب حتی قادین حرکتی میللی حرکتده ن موستقیل اولمالیدیر دا دئییلیر!. بو تئوری نین ایندیه دک دونیانین میللی آزادلیق(ضد استعماری) موباریزه لری نین "هئچ" بیرینده گورسنمه دیغی بو تئوری نین نقدر بوش اولدوغونو توم سوبوتا چاتدیریر.
آنجاق بو تئوری یه باشقا طرفده نده باخماق اولور. توپلومدا یارانان حرکتلر عمومییتله آیری سئچگیلیکلر اوچون یارانیرلار و سیاسی-ایجتیماعی-فرهنگی... فعاللار هر بیر ساحه ده آیری سئچگیلیک بیلدیکلری قونولار حاقدا چالیشیرلار. گونئی آذربایجاندا دا کولتورل، جینسی، دینی، ایقتیصادی و... آیری سئچگیلیکلیکری هامی بیلیر و آرتیق ایضاحاتا گرک یوخدور. 100 ایلدن آرتیق آغیر و غئیری اینسانی تضییقلره معروض قالان آذربایجان میللتی آزدالیق یولوندا مینلرجه شهید، اسیر و محبوس وئرمیشدیر و ساواش حالا داوام ائدیر. بو آرادا آما بیر اونملی مساله یی نظره آلمالی ییق. گونئی آذربایجانین دورومونو نظره آلاراق، بو سورویا جاواب وئرمه لی ییک "گونئی آذربایجاندا هر بیر آیری سئچگیلیکین چوزولمه سی هانسی آنا آیری سئچگیلیکین چوزولمه سینه باغلیدیر؟". باشقا طرزیله دئسک، "هانسی آیری سئچگیلی یین چوزولمه مه سی دیگر آیری سئچگیلیکلرینده چوزولمه سینه مانعه اولور؟".
گونئی آذربایجانین استعمار-استبداد آلتیندا یاشاماسینا دایاناراق بو سورویون جاوابی اورتایا چیخیر. ایقتیصادی، جینسی، دینی، کولتورل و... ساحه لرده چالیشمالاری عمومییتله ایکی یئره بولمک اولار. بیر بولوم توپلومون ایچینده کی یانلیش سوننتلری دئییشدیرمک، اوبیری ایسه حاکیم یاسالاری دئییشدیرمک. بیرینجی بولوم حاکیم دولتین ائتگیسینه رغمن آراسیرا داوام ائده بیلیر، اما دوروما باخاراق سونوج آلماسی اوزون زامان آلیر و سونوجا وارماسیدا بئله بللی دئییلدیر. ندنیسه، بیرینجی بولومون ایکینجی بولومه باغلی اولماسیدیر. دئملی اونملی ساواش، حاکیم یاسالاری دئییشمکده دیر. یئنیدن یادا سالمالی ییق آذربایجان میللتی فارس میللتینده ن آیری اولاراق هم استعمار و هم استبداد آلتیندا یاشاییر. بو او دئمکدیر آذربایجاندا یاشانان آیری سئچگیلیکلر ایران حاکیمییتین استعمار-استبداد یندان دولاییدیر.
ایقتیصادی، جینسی، دینی و... ساحه لره دایاناراق حاکیم یاسالاری دئییشدیرمکه چالیشماق، "استبداد"ی آزالتسادا "استعمار"ی اوقدرده ائتگیلمیر. دئمه لی حتی استبداد ایران حاکمییتینده ن آزالسادا، یئنه ده گونئی آذربایجاندا تورک کیملیگینده ن آسیلی اولاراق ایقتیصادی، جینسی، دینی و... آیری سئچگیلیکلری گوره جه ییک. آما استعمار آزالیرسا یاخود آرادان گئدیرسه، ایستر ایسته مز استبداد دا آرادان گئده جکدیر. بونلاری نظره آلاراق بللی اولونور گونئی آذربایجاندا فرقلی ساحه لرده اولان آیری سئچگیلیکلرین چوزولمه سی "هئچ" زامان بیریبیریلرینده ن آیری دئییلدیر و مستقیل اولامازلار. عئینی حالدا گونئی آذربایجاندا آیری سئچگیلیکلرین باش ندنی ایران حاکمیییتین استعماری ماهیتی اولماسی اوچونده هر بیر حرکت اوز کوکونو میللی حرکتدن(ناسیونالیسم) آلمالیدیر. بو متدو ان گوزل شکیلده اویرنجی حرکتی، ایشچی حرکتی و... گورمک مومکوندور.
بونلاری دئمک او آنلامدا دئییلدیر گونئی آذربایجان دا صیرف فمینیستی پارتی یارانماسین یاخود یارانماسینا مانعه قویولسون. هر اینسان سئچدیغی یول و توتومدا سربستدیر و بونا اینانماماق گئریچیلیکدیر. اما بونو نظره آلمالی ییق هر بیر پارتیانین یارانما ندنی اولمالیدیر. عومومییتله پارتیالار بیر حرکته دایالی یارانیرلار. سیاسی، ایجتیماعی و... حرکتلرینده ن او ساحه لرده چالیشان پارتییالار یارانیر و هر بیر حرکتین اوزوده بیر احتیاجدان دولاییدیر. دئمه لی گونئی آذربایجاندا فمینیستی پارتی یارانماسی اوچون ایلک اونجه توپلومسال احتیاج اولمالیدیر. بو احتیاج(یانلیز فمینیسم) گونئی آذربایجاندا یاشایان تورک میللتینده دویولورمو؟ "یانلیز فمینیسم"ه اولان احتیاجی "میللی" احتیاجلا ساده جه گونئی آذربایجان قادینلاری آراسیندا توتوشدوراق. تیراختور اویونلارینا ماراقلانانلار و اویونلارینا گئدن قادینلار، میللی محبوس قادینلار، اورموگولو اوچون چالیشان قادینلار، آذربایجان رقصی و موسیقی سی حاقدا چالیشان قادینلار، فئیس بوکدا مینلرجه بوزقورد ایشاره تی توتان و تورکجه میللی شوعارلار یایان قادینلارین سایی سی نی فمینیسمه عایید اولان کاراکتئرلری یایان قادینلارلا توتوشدورون. آرادا قات قات فرق واردیر. گونئی آذربایجان قادینلاری آراسیندا میللی احتیاج فمینیسمه باخاراق چوخ چوخ دویولور و او اوچون ده زورلا "یانلیز فمینیستی" پارتی یاراتماق بوقدر یاراشماز نظره گلیر.
گونئی آذربایجان قادین حرکتی ماهییت اعتیباریله گونئی آذربایجان قادینلارینا آزادلیق، رفاه و سعادت ایسته ییر و بو ایستکی دوغرولتماق اوچون موجادیله آپاریر و ساواشیر. میللی حرکته دایالی تعریف اولان گ.قادین حرکتی گ.آذربایجاندا آیری حرکتلریله ده ایشبیرلیک و علاقه ده دیر. ایشچی حرکتی، اویرنجی حرکتی، چئوره و... هامی سی بیر بوداغین یاپراقلاریدیر و بوتوولوکده میللی حرکتی یارادیرلار. هر بیریسی نین اوزل توتوملاری اولسادا نهایتده بشر حاقلارینا دایالی واراولان میللی حرکتده بیر واحید بدن اولورلار.
اونوتمایالیم قادین حاقلاری نی الده ائتمگ اوچون، دموکراتیزاسیون کیمی، توپلومودا حاضیرلاماق گرک و بو پروسسده زامان آلیجیدیر. او اوچون ایندیده ن باشلاماق لازیمدیر و یوبانمیشیقدا. گلجکده دموکراسی نی دولتین آدینی دئییشمکله دئییل، دموکرات اینسانلارلا یاراتماق مومکوندور. آینی سی، قادینلارین حاقلاری نی قوروماق اوچون یارانمیش دولتی ده ساده جه کاغیذ اوستونده یازیلان یاسالار دئییل، بو حاقلارا اینانان توپلوم و سیاسی فعاللار یاراداجاقدیر. هامیمیز بو یولدا ایلک اوزوموزده ن باشلامالی ییق.
Submit to DeliciousSubmit to DiggSubmit to FacebookSubmit to Google PlusSubmit to TwitterSubmit to LinkedIn